lunes, 25 de octubre de 2010

Cursos d'aragonés en Nogará 2010-11

Como todas as anyadas, l'asociación Nogará-Religada ufierta os suyos cursos d'aragonés de 1º y 2º ran presencials y a distancia. I hai prous horarios y o pre d'os cursos ye de 75 € (3 horas semanals de noviembre a chunio).
Si en quiers más información:
- Pasa-te por Nogará (C/ Gavín 6)
- Escribe a: asoziazion@nogara-religada.org
- Pasa-te por a tabierna A Flama (C/ Mayor 53)
Anima-te y apunta-te-ie!

domingo, 24 de octubre de 2010

Noticietas breus d'actividatz

María Pilar Benítez Marco presentó en agosto, en Chaca y Benás, o libro "María Moliner y las primeras estudiosas del aragonés y del catalán de Aragón", editau por REA, fendo homenache a 34 mullers, estudiosas de "tot lo territorio lingüistico aragonés y, per tanto, d'as tres luengas que i coexisten: aragonés, castellán y català".


Iste verano ha estau o 10º cabo d'anyo de l'Asociación cultural O Trinquete, d'Arandiga, y se i han parau unas chornadas sobre as luengas d'Aragón, y una trobada per a cultura aragonesa, con procheccions, exposicions, charradas, conciertos, cine, marcha senderista, actividatz ta ninos, teatro en aragonés, pasavillas...
As chornadas "Amplificando el silencio" d'o siello discografico Magofermín se celebrón d'o 16 a o 18 de setiembre en a ribera de l'Ebro de Zaragoza; unas chornadas de cultura libre a on se i podión conoixer atras trazas de cultura más alternativas. Se i fación charradas, tallers, radio, puestos de material d'esferents colectivos socials y culturals d'Aragón como Nogará-Religada, actividatz ta ninos, conciertos de mosica libre...

 

O 23 de setiembre se fació, en o centro social autochestionau A Enrestida, una charrada-curset d'a proposa ortografica de l'Academia de l'Aragonés, a cargo de Fernando Sánchez.


 

O viernes 8 d'octubre Nogará-Religada participó, con gran afluencia de chent, en un pasavillas prepilars per o vico zaragozano d'a Madalena, metendo as carreras en aragonés.


 

D’o chueves 14 a o domingo 17 d'octobre, estió n'a Feria de muestras de Zaragoza o Salón Aragonés, a on Nogará-Religada metió puesto, de conchunta con Ligallo de Fablans, y a on a espardidura de l'aragonés estió a-saber-lo de present: introducción a l’aragonés, charradas, teatro en aragonés, lectura de relatos curtos en aragonés…

O domingo 17 d'octubre en a ikastola Paz de Ziganda en Villava (Navarra) ha estau a gran borina d'as ikastolas navarras y d'as luengas minoritarias europeas, o Nafarroa Oinez. Entre os suyos obchectivos, ye replegar diners t'as ikastolas, pues gosan d'estar privadas, empentadas per a iniciativa de pais y mais que quieren que os suyos fillos y fillas charren en a suya luenga, l'euskera; y, prou que sí, empentar l'emplego d'ista chicota y polida luenga en a suya tierra. Amás, se i reivindican as luengas minoritarias europeas, entre as que i ha estau representau l'aragonés, como ye de dar, per Silvia Cebolla, de l'A.C. Nogará-Religada.

jueves, 14 de octubre de 2010

Nafarroa Oinez 2010

Unatra vegada más tenemos aquí a gran borina d'as ikastolas de Navarra. Entre os suyos obchectivos, son replegar diners t'as ikastolas, pues gosan d'estar privadas, empentadas por a iniciativa de pais y mais que quieren que os suyos fillos y fillas charren en a suya luenga, l'euskera; y prou que sí, empentar l'emplego d'ista chica y polida luenga en a suya tierra.
Amás, se i reivindicarán as luengas minoritarias europeas, entre as que i será ripresentada l'aragonés, como ye de dar.
Si queretz sinyar o manifiesto "Txikiak handi", que en aragonés ye "Chicotz, pero grans", individualment u como colectivo, lo podetz fer aquí: http://www.nafarroakoikastolak.net/oinez/eu/sinadurakAR.asp
O domingo 17 d'octobre en a ikastola Paz de Ziganda en Villava (Navarra) será a gran borina d'as ikastolas navarras y d'as luengas minoritarias europeas. Más info: http://www.nafarroaoinez.net/

lunes, 11 de octubre de 2010

Salón aragonés (14 - 17 d'octobre)

Dende iste chueves 14 dica o domingo 17 se celebrará en a Feria de Muestras de Zaragoza o Salón aragonés, a on i participará Nogará-Religada chunto a Ligallo de Fablans, con puesto y varias actividatz. Será ubierto dende as 11:30 dica as 20:30 h.
Iste ye o programa d'actividatz:

SALON ARAGONES, dias 14, 15, 16 y 17 d'octobre en a feria de muestras
de Zaragoza

PROGRAMA D’ACTIVIDATZ

CHUEVES 14 D’OCTOBRE
20:00 h. Introducción a l´aragonés

VIERNES 15 D’OCTOBRE
19.45 h. Obra de teatro "As cartas d'a lola Bisi" en luenga aragonesa.

SABADO 16 D’OCTOBRE
12.00 h. Demostracions d’a “tronca de Nadal” en o stand de A.C. Nogará –
Religada y Ligallo de Fablans de l´aragonés.

13.30 h Charrada en aragonés por Bastian Lasierra de Radio Ebro.

19.45 h. Obra de teatro "Caperuxeta Roya" en luenga aragonesa .

DOMINGO 17 DE’OCTOBRE
13.30 h. Lectura de relatos curtos por Fernando Estabén.

EXPOSICIONS, ACTIVIDATZ y TALLERS PERMANENTS
Espardidura de l´aragonés en el stand de Nogará – Religada y Ligallo de
Fablans de l´aragonés

Amás de tot isto, tamién i habrá atras asociacions con atras actividatz relacionadas con as tradicions, cultura, folklore y gastronomía aragonesa.

Concierto de Comando Cucaracha

Aintro d'as fiestas d'o Pilar de Zaragoza, o miercols en a carpa d'o ternasco (C/ Moret - Pza. d'os Sitios) podremos gronxiar-nos con l'actuación d'a colla aragonesa Comando Cucaracha. Será a ixo d'as 22 h.

miércoles, 6 de octubre de 2010

Pasavillas en a Magdalena

Iste viernes 8, ta prencipiar as fiestas d'o Pilar de Zaragoza, se ferá un pasavillas por as carreras d'o vico zaragozano d'a Magdalena, a on se meterán os nombres d'as carreras en aragonés.
Será a las 21 h. dende a Pza. d'a Magdalena y dimpués i habrá barra astí ta fer-se uns gotetz.
Tos i asperamos!